అక్షరటుడే, వెబ్​డెస్క్ : Warangal | వరంగల్​ (Warangal)లో​ రాజకీయ విభేదాలు తీవ్ర స్థాయికి చేరాయి. నాయకులు ఒకరిపై ఒకరు ఆరోపణలు చేసుకుంటున్నారు. ఈ క్రమంలో అమ్మవారికి సమర్పించాల్సిన బోనాలను కూడా రాజకీయ కారణాలతో ప్రభుత్వం వాయిదా వేయడం గమనార్హం. ఉమ్మడి వరంగల్​ జిల్లాలో కొండా కుటుంబానికి ఇతర కాంగ్రెస్​ ఎమ్మెల్యేకు మధ్య పోరు నడుస్తోంది. దీంతో ఎమ్మెల్యేలు కడియం శ్రీహరి, నాయిని రాజేందర్​రెడ్డిపై మంత్రి కొండా సురేఖ (Konda Surekha) సంచలన వ్యాఖ్యలు చేసిన విషయం తెలిసిందే. ఈ క్రమంలోనే తాజాగా వరంగల్​ భద్రకాళి అమ్మవారి (Bhadrakali Temple) బోనాలను వాయిదా వేస్తున్నట్లు ఆమె ప్రకటించారు.

Warangal | గొడవలు సృష్టిస్తారన్న అనుమానంతో..

వరంగల్​ భద్రకాళి అమ్మవారికి ఈ నెల 22న బోనాలు సమర్పించాలని తొలుత నిర్ణయించారు. ఆగమ శాస్త్రం ప్రకారం అమ్మవారికి శాఖాహార బోనం సమర్పించాలని పండితులు చెప్పారని కొండా సురేఖ తెలిపారు. ఈ మేరకు శాఖాహార బోనాలు ఉంటాయని ఇప్పటికే పలుమార్లు చెప్పినట్లు ఆమె పేర్కొన్నారు. అయినా కొందరు సోషల్​ మీడియాలో మాంసాహార బోనాలు సమర్పిస్తున్నారని తప్పుడు ప్రచారం చేస్తున్నారని ఆరోపించారు. అలాగే ప్రస్తుత రాజకీయ విభేదాల నేపథ్యంలో ఇబ్బందులు పెడతారని బోనాలు వాయిదా వేశామన్నారు. అసాంఘిక శక్తులను ప్రేరేపించి గొడవలు సృష్టిస్తారన్న అనుమానంతో ఈ నిర్ణయం తీసుకున్నట్లు మంత్రి ప్రకటించారు.