అక్షరటుడే, వెబ్​డెస్క్: KTR | తెలంగాణలో రాజకీయాలు సవాళ్లు.. ప్రతిసవాళ్లతో హీటెక్కాయి. ఇటీవల హైదరాబాద్​లోని ఎల్బీ స్టేడియం (Hyderabad LB Stadium)లో జరిగిన సభలో సీఎం రేవంత్​రెడ్డి మాట్లాడుతూ.. రైతు సంక్షేమంపై తాము చర్చకు సిద్ధమని ప్రకటించారు. కేసీఆర్​, కేటీఆర్​ ఎవరు వస్తారో రావాలని ఆయన సవాల్​ విసిరారు. ఈ సవాల్​ స్వీకరించిన మాజీ మంత్రి, బీఆర్​ఎస్​ వర్కింగ్​ ప్రెసిడెంట్​ కేటీఆర్(BRS Working President KTR)​ తను చర్చకు సిద్ధమని ప్రకటించారు. అంతేగాకుండా జులై 8న (మంగళవరం) సోమాజీగూడ ప్రెస్​క్లబ్​కు రావాలని సవాల్ చేశారు.

KTR | ప్రెస్​క్లబ్​కు బయలుదేరిన కేటీఆర్​

ప్రెస్​క్లబ్​కు రావాలని కేటీఆర్​(KTR) సవాల్​ చేయడంపై ఇటీవల మంత్రులు స్పందించారు. ప్రెస్​క్లబ్​లో కాదు.. అసెంబ్లీలో చర్చ పెడదామన్నారు. అయితే కేటీఆర్​ మాత్రం సోమాజిగూడ ప్రెస్​క్లబ్​కు బయలు దేరారు. ముందుగా తెలంగాణ భవన్(Telangana Bhavan)​ చేరుకున్న ఆయన అక్కడ మీడియాతో మాట్లాడారు. అనంతరం భారీ కాన్వాయ్‌తో ప్రెస్​క్లబ్​కు బయలుదేరారు. కేటీఆర్‌ వెంట మాజీ మంత్రులు ఎర్రబెల్లి దయాకర్​, గంగుల కమలాకర్​, వేముల ప్రశాంత్​రెడ్డి, తలసాని శ్రీనివాస్​ యాదవ్​ ఉన్నారు.

KTR | ప్రెస్​క్లబ్​కు బీఆర్​ఎస్​ నేతలు.. అసెంబ్లీకి కాంగ్రెస్​ ఎమ్మెల్యేలు

కేటీఆర్​ సవాల్​ నేపథ్యంలో బీఆర్​ఎస్​ శ్రేణులు భారీగా ప్రెస్​క్లబ్​కు చేరుకుంటున్నాయి. రైతుల సంక్షేమంపై చర్చకు రావాలని కేటీఆర్​ పేర్కొన్న విషయం తెలిసిందే. అయితే తాము అసెంబ్లీలో చర్చకు సిద్ధమని కాంగ్రెస్​ నేతలు చెబుతున్నారు. ప్రస్తుతం సీఎం రేవంత్​రెడ్డి(CM Revanth Reddy) ఢిల్లీ పర్యటనలో ఉన్నారు. ఈ క్రమంలో కాంగ్రెస్​ ఎమ్మెల్యేలు(Congress MLA) అసెంబ్లీకి చేరుకుంటున్నారు. సమస్యలపై చర్చించాల్సింది ప్రెస్​క్లబ్​లో కాదని.. అసెంబ్లీలో అని వారు అంటున్నారు. కాగా.. తాము మంత్రులతో సైతం చర్చకు సిద్ధమని కేటీఆర్​ ప్రకటించారు.

KTR | మోసపూరిత పాలన

రాష్ట్రంలో 18 నెలలుగా మోసపూరిత పాలన సాగుతోందని కేటీఆర్​ అన్నారు. ఆయన తెలంగాణ భవన్​ వద్ద మీడియాతో మాట్లాడారు. అడ్డగోలు హామీలతో రైతులను మోసం చేశారన్నారు. దమ్ముంటే చర్చకు రావాలని రేవంత్​రెడ్డికి సవాల్​ చేశారు. అసెంబ్లీలో చర్చ పెట్టరు..పెట్టినా తమకు మైక్ ఇవ్వరని ఆరోపించారుర. అభివృద్ధిపై చర్చకు రావాలని ఎన్నోసార్లు కోరామన్నారు.గతంలో రేవంత్​రెడ్డి కొడంగల్‌లో ఓడితే రాజకీయ సన్యాసం తీసుకుంటామన్నారని కేటీఆర్​ పేర్కొన్నారు. సవాల్ విసిరి మాట తప్పడం రేవంత్‌కు అలవాటే అని ఎద్దేవా చేశారు. సీఎం సవాల్​ స్వీకరిచి సోమాజిగూడ వెళ్తున్నట్లు కేటీఆర్​ పేర్కొన్నారు. రేవంత్ ఢిల్లీలో ఉన్నారు కాబట్టి.. మంత్రులెవరైనా వస్తారేమో చూస్తామన్నారు. మంత్రులతో అయినా చర్చకు తాము సిద్ధం అని కేటీఆర్​ ప్రకటించారు. కాగా కేటీఆర్​ సవాల్​ నేపథ్యంలో ప్రెస్​క్లబ్ వద్ద పోలీసులు భారీ బందోబస్తు ఏర్పాటు చేశారు.

Read all the Latest News on Aksharatoday.in