అక్షరటుడే, వెబ్​డెస్క్ :Telegram CEO | టెలిగ్రామ్‌ వ్యవస్థాపకుడు, సీఈవో పావెల్‌ దురోవ్‌ (CEO Pavel Durov) సంచలన వ్యాఖ్యలు చేశారు. తాను వంద మంది పిల్లలకు తండ్రినని ఆయన గతంలో చెప్పారు. తాజాగా ఆ పిల్లలందరికి తన ఆస్తిలో వాటా ఇస్తానని ప్రకటించారు.

తాను 15 ఏళ్ల పాటు వీర్యదానం చేయడంతో 12 దేశాల్లో 100 మంది పిల్లలు జన్మించినట్లు గతేడాది జూలైలో పావెల్(Pavel)​ ప్రకటించారు. తాజాగా ఆయన మరో సంచలన విషయాన్ని వెల్లడించారు. ఇటీవల తాను వీలునామా రాశానని ఆయన పేర్కొన్నారు. తాను సహజంగా జన్మనిచ్చిన సంతానంతో పాటు ఈ 100 మంది పిల్లలకు కూడా తన ఆస్తిలో సమాన హక్కు ఉంటుందని వీలునామా(Will)లో రాసినట్లు తెలిపారు. దాదాపు 20 బిలియన్‌ డాలర్ల తన సంపదను వీరందరికీ సమానంగా పంచుతానని చెప్పారు. అయితే ఆయన ఇందులో ఓ కండిషన్​ కూడా పెట్టారు. 30 ఏళ్ల వరకు వారు ఈ సంపద పొందలేరని చెప్పారు.

Telegram CEO | పెళ్లి కాకుండానే..

టెలిగ్రామ్​ సీఈవో(Telegram CEO)కు వివాహం కాలేదు. అయితే తనకు ముగ్గురు సహజీవన భాగస్వాములు ఉన్నట్లు ఆయన చెప్పారు. వారితో తనకు ఆరుగురు సంతానం ఉన్నారని తెలిపారు. తనకు ఎంతో మంది శత్రువులు ఉన్నారని, అందుకే 40 ఏళ్ల వయసులోనే వీలునామా రాసినట్లు పావెల్​ చెప్పుకొచ్చారు.