అక్షరటుడే, వెబ్​డెస్క్ : World War | బాంబులు పేలకుండా ఏళ్లుగా అలాగే ఉంటాయా అంటే అవుననే అంటున్నారు నిపుణులు. దశాబ్దాలుగా పేలకుండా ఉన్న బాంబులను ఇటీవల గుర్తిస్తున్నారు. రెండో ప్రపంచ యుద్ధం (World War -II) చాలా దేశాల స్థితిగతులన మార్చేసింది. అప్పటి వరకు అగ్రగామిగా ఉన్న దేశాలు పతనావస్థకు చేరితే.. పలు దేశాలు ఆధిపత్యం సాధించాయి. అయితే ఈ యుద్ధంలో జర్మనీ(Germany), జపాన్(Japan)​ ఎక్కువగా నష్టపోయాయి. దీనికి కారణం అమెరికా, బ్రిటన్​ దేశాలు జర్మనీపై భారీగా బాంబులతో దాడులు చేయడమే. తాజాగా జర్మనీలో రెండో ప్రపంచ యుద్ధం నాటి బాంబును అధికారులు గుర్తించారు.

World War | సురక్షిత ప్రాంతాలకు ప్రజల తరలింపు

జర్మనీ (Germany) లోని కొలోన్‌ నగరంలో రెండో ప్రపంచ యుద్ధం సమయంలోని మూడు బాంబులను ఇటీవల గుర్తించారు. దీంతో అధికారులు అప్రమత్తమై ఆ ప్రాంతాల నుంచి ప్రజలను తరలించారు. అలాగే సమీప ప్రాంతాలకు కొంతకాలం రాకపోకలు కూడా నిలిపివేశారు. ముందు జాగ్రత్త చర్యల్లో భాగంగా నగరవ్యాప్తంగా అంబులెన్సులు, భద్రతా బలగాలను మోహరించామన్నారు. ఈ బాంబులు అమెరికా(America) తయారు చేసినట్లు అధికారులు భావిస్తున్నారు. వీటిలో రెండు బాంబులు వెయ్యి కిలోల చొప్పున ఉండగా, ఒకటి 500 కిలోల బరువు ఉంటుంది. వాటిని నిర్వీర్యం చేయడానికి అధికారులు యత్నిస్తున్నారు.

World War | 20 శాతం పేలని బాంబులు

పోలాండ్​పై 1939లో జర్మనీ దాడితో రెండో ప్రపంచ యుద్ధం మొదలైంది. నాడు తీవ్ర దూకుడు మీద ఉన్న హిట్లర్​(Hitlar) నాజీ సేనల పతనమే లక్ష్యంగా అమెరికా(America), బ్రిటన్ (Britan)​ కలిసి జర్మనీపై వేలకొద్ది బాంబులు వేశాయి. అందులో చాలా బాంబులు పేలకుండా అలాగే ఉండిపోయాయి. యుద్ధ సమయంలో జర్మనీపై 1.5 మిలియన్​ బాంబులు వేసినట్లు సమాచారం. ఇందులో దాదాపు 20శాతం పేలకుండా అలాగే ఉండిపోయాయి. అవి అప్పుడప్పుడు ప్రజలకు కనిపిస్తుండటంతో అధికారులు నిర్వీర్యం చేశారు. 2017లో కూడా జర్మనీ అధికారులు పేలని బాంబును గుర్తించారు. 2024లో 31 బాంబులను కనుగొన్నట్లు అధికారులు తెలిపారు.